Revue de presse

Weltwäit gëtt et een enorme Besoin un Enseignanten, fir de Kanner eng gutt Schoulausbildung ze erméiglechen. Bis d'Joer 2030 ginn den aktuelle Prognosen vun der UNESCO no, weltwäit, bal 69 Milliounen nei Enseignanten gebraucht.

Um Donneschdeg ass den internationalen Dag vum Enseignant. Enger Etude vun Eurostat no, déi e Mëttwoch an deem Kontext publizéiert gouf, ass hei zu Lëtzebuerg nëmmen all 5. Enseignant méi al wéi 50 Joer. Den Duerchschnëttsalter vun de Enseignanten ass domat deen Niddregsten an der Europäescher Unioun, hanner Groussbritannien a Malta.

A punkto Salaire schneiden d'Enseignanten hei am Land europawäit am beschten of. Der Etude no, louch de Brutto-Salaire vun engem Enseignant an der Fonction Publique op ee Joer bei ronn 90.600 Euro. Den Enseignement ass dann och weiderhin ee Beruff, wou an der Majoritéit Frae vertruede sinn. Hei am Land sinn 65% vun den Enseignanten an der Grondschoul an am Secondaire weiblech. Bal 6.800 vun den am ganzen 9.900 Enseignante waren am Joer 2015 Fraen.

Den Educatiounsminister Claude Meisch huet an deem Kontext matgedeelt, dass aktuell 24 Enseignanten, déi vu Portugal zur Dispositioun gestallt goufen, a Lëtzebuerger Schoulen beschäftegt sinn. Op déi Manéier soll déi plurilingual Entwécklung bei de portugiseschsproochege Kanner gefërdert ginn an hinnen erméiglechen, hir Schoul besser ze packen. Dat wier 1 Schüler op 4, huet et vum zoustännege Minister geheescht. Dës Initiative schreift sech an eng Kooperatioun tëscht Lëtzebuerg a Portugal, déi am Abrëll dëst Joer an engem sougenannte Memorandum festgehale gi war.

Et ginn 3 verschidden Typpen vun Enseignement vum Portugiseschen an der Lëtzebuerger Grondschoul. Et sinn dat zum Beispill integréiert Coursen, wou déi betraffe Kanner aus de Cyclen 2 bis 4, zwou Stonnen d'Woch aus der Klass geholl ginn, a Fächer wéi Eveil a Sciences op Portugisesch enseignéiert kréien. Fir dëst Schouljoer sinn et zéng Gemengen, déi am ganze 65 sou Coursen proposéieren.

Zanter der Rentrée kënnen d'Gemengen och alternativ Coursen ubidden, deemno zousätzlech Stonnen. Et sinn dat zwou Stonnen fir d'Schüler vun de Cyclen 2 bis 4, baussent den eigentleche Schoulstonnen, d.h dënschdes an donneschdes mëttes. Dräi Gemengen, et sinn dat Esch, d'Stad, an do méi spezifesch de Garer Quartier, a Réimech organiséieren den Ament am ganzen 46 sou Coursen.

Donieft leeft ee Pilotprojet fir d'Kanner vum Cycle 1, a Collaboratioun mat de Chercheuren vun der Uni Lëtzebuerg. Dëse Projet gesäit vir, dass ee portugiseschsproochegen Assistent während zwou Stonnen d'Woch an enger Klass present ass, nieft dem eigentlechen Enseignant. Aktuell gëtt des Method a ronn 30 Klassen applizéiert. Eng Evaluatioun vun dësem Pilotprojet ass fir d'Enn vun dësem Schouljoer geplangt.